Sachche Suchche Mittar

नैतिक शिक्षा कन्नै भरोची दियें कत्थें क्हानियें दा खजाना हर भाशा च मौजूद होंदा ऐ। एह् कत्थां क्हानियां सदियें-सदियें थमां मूंह् जवानी दी परंपरा राहें माहनू दे मनोरंजन दे कन्नै-कन्नै सिक्ख मत्त बी प्रदान करदियां अवै करदियां न। एह् माह्नू दा नमुल्ला सरमाया न। इक भाशा दियें नैतिक कत्थें दा अनुवाद दूई च ते दूई दा त्री च होई चुके दा ऐ ते एह सिलसिला नरंतर चलै करदा ऐ। पंचतंत्र इ’यै जनेही नैतिक ते शिक्षाप्रद कत्थें कन्नै भरोचे दा ऐ। पंचतंत्र च आचार्य विष्णु शर्मा होरें माह्नू, जनौरें, पैंछियें ते होरनें जीवें दे पात्रें दे माध्यम कन्नै सिक्ख-मत्त देने आह्लियें कत्थें क्हानियें दे राहें जिंदगी दे पूरे दर्शन दा चित्ररत कीते दा ऐ। इ’नें क्हानियें दी हर क्हानी दा अपना इक बक्खरा अस्तित्व होंदे होई बी हर इक क्हानी इक दूई कन्नै जुड़ी दी ऐ। इ’यां मसूस होंदा ऐ जि’यां आक्खो डोगरी च कोई कलीदार कत्थ चलै करदी होंदी ऐ। कत्थै दी इक कली मुकदी ऐ ते उस कन्नै जुड़दी उस्सै कत्थै गी अग्गै बधाने आह्ली दूई कत्थ शुरू होई जंदी ऐ ते एह् सिलसिला नरंतर चलदा रौंह्दा ऐ। इ’यां लगदा ऐ जि’यां आक्खो कोई उपन्यास दी कथा चलै करदी होंदी ऐ। हर क्हानी च कोई न कोई शिक्षा ते दर्शन छप्पा गुज्जा बी ते जाह्री तौरा पर बी समाए दा ऐ। डोगरी पाठकें ते बाल ´्यानें गी डोगरी भाशा च एह् पोथी सौंपदे होई मिगी अनसम्ब खुशी बझोऐ करदी ऐ। मेद कीती जाई सकदी ऐ जे ´्यानें दे कन्नै - कन्नै बड्डें गी बी एह् पोथी जरूर पसंद औग। Read more